15.08.2012 17:49

Gjaldfall

Var að lesa hreint út sagt skelfilega frétt á Vísi rétt í þessu. Á yfirborðinu lítur þetta út fyrir að vera hið besta mál, loksins á að gera eitthvað í þessum lestrarvandamálum. Þegar maður les greinina hins vegar vel stingur þessi lýsing á aðferðarfræðinni mjög í augu:

"Við notumst við eina bók í senn, tökum sem dæmi Palli var einn í heiminum. Til að byrja með lesum við bókina fyrir börnin og ræðum svo um hana. Þannig tryggjum við að allir í bekknum skilji um hvað sagan fjallar áður en þeir fara að rembast við að lesa hana."

Lengi hafa margir og ég þeirra á meðal gagnrýnt skólakerfið fyrir að vera framleiðsla á slakri meðalmennsku, þar sem þeir sem framast standa þurfa að bíða eftir hópnum meðan verið er að reyna að halda meðaltalshópnum nokkurn veginn í horfinu. Með þessu á að taka skrefið til fulls, yfirferðarhraðinn á efninu mun sem sagt miðast við slakasta nemandann í hópnum, þeir sem geta farið hraðar yfir fá nú að eyða enn meiri tíma en áður í að hanga og bíða eftir restinni af hópnum.

Svo er fólk hissa á því að börnum leiðist í skólanum og eigi erfitt með að halda athygli við nám - svona fíflagangur er algjörlega gerður til að standa í vegi fyrir þeim.